ನಮ್ಮೂರಿನಲ್ಲಿ ಕಳೆದ ಬಾಲ್ಯ ಮತ್ತು ಈ ಲಂಡನ್ ಬ್ರಿಡ್ಜ್

ಮಾರ್ಚ್ ೨೦೧೩ ಸಖಿಯಲ್ಲಿ ಪ್ರಕಟವಾಗಿದೆ 

ಅದೊಂದು ಕಾಲವಿತ್ತು ವಾರಾಂತ್ಯ ಬಂದರೆ ಮನೆ ಕ್ಲೀನ್ ಮಾಡುವುದು . ಇಂದಿಗೂ ಕೂಡ ಬೆಂಗಳೂರಿನ ಬ್ಯುಸಿ ಲೈಫ್ ನಲ್ಲಿ ಕಳೆದುಹೊಗಿರುವವರು ಭಾನುವಾರವನ್ನು ಮನೆ ಕ್ಲೀನ್ ಮಾಡುವುದು ಇಲ್ಲ ಮನೆಗೆ ಬೇಕಾದ ಸಾಮಾನು ತರುವುದು ಬಿಲ್ ಕಟ್ಟಿ ಬರುವುದು ಹೇರ್ ಕಟ್ ಇಲ್ಲವೇ ಬ್ಯೂಟಿ ಪಾರ್ಲರ್ ಗಳಿಗೆ ಹೋಗುವುದು ಹೀಗೆ ಮೀಸಲಿಡುತ್ತಾರೆ . ಆದರೆ ಈ ಲಂಡನ್  ನಲ್ಲಿ ಹಾಗಲ್ಲ . ವಾರಾಂತ್ಯ ಬಂದರೆ ಹೊಸ ಜಾಗ ನೋಡಲು ಹೋಗುವುದು . ನನಗೆ ಮೊದಲಿನಿಂದಲೂ ಸುತ್ತುವುದೆಂದರೆ ಬಹಳ ಇಷ್ಟ ಅದಕ್ಕೆ ಸರಿಯಾಗಿ ನನ್ನ ಪತಿಗೂ ಶನಿವಾರ ಬಾನುವಾರ ಎಂದರೆ ಹೊರಗೆ ಹೋಗಬೇಕು ಹೊಸಜಾಗ ನೋಡಬೇಕು ೨ ವರ್ಷಗಳಿಂದ ಲಂಡನ್ ಸುತ್ತಿ ಈಗ ಎಲ್ಲ ಹತ್ತಿರದ ಜಾಗಗಳು ಪ್ರವಾಸಿ ಸ್ಥಳಗಳು ಚರಪರಿಚಿತವಾಗಿ ಹೋಗಿವೆ. 

ಹಾಗೆ ಹತ್ತಿರದ ಎಲ್ಲ ಸ್ಥಳಗಳನ್ನು ಭೇಟಿ ನೀಡಿ ಆದದ್ದರಿಂದ ಈಗ ಪಾರ್ಕ್ ಗಳು , ಸಿನೇಮ ಗಳಿಗೆ ಹೋಗುವುದು ಪ್ರಾರಮ್ಭಿಸಿಯಾಗಿದೆ . ಆದರೂ  ನಮ್ಮದೊಂದು ಫೆವರೆಟ್ ಸ್ಥಳವೆಂದರೆ ಟವರ್ ಬ್ರಿಡ್ಜ್ .  ಲಂಡನ್ ನ ಟವರ್  ಬ್ರಿಡ್ಜ್ ಯಾರಿಗೆ ತಾನೇ ಇಷ್ಟವಿಲ್ಲ ಇಲ್ಲಿ ಬಂದ  ಎಲ್ಲರಿಗು ಲಂಡನ್ ಬ್ರಿಡ್ಜ್ (ಟವರ್ ಬ್ರಿಡ್ಜ್) ನೋಡುವುದೇ ಒಂದು ಸಂತೋಷ . ಎಷ್ಟು ಭಾರಿ ನೋಡಿದರೂ  ಮನ ತಣಿಯದು ಮತ್ತೆ ಮತ್ತೆ ನೋಡಲೇ ಬೇಕು ಎಂದೆನಿಸುವ ಸ್ಥಳವದು.  ಹಾಗೆ ನಮ್ಮಿಬ್ಬರಿಗೂ ಈ ಸ್ಥಳ ಬಹಳ ಇಷ್ಟ . 

ಅದು ಬಹಳ ಇಷ್ಟವಾಗಲು ಕಾರಣಗಳೂ ಇವೆ.  ನಮ್ಮವರನ್ನೆಲ್ಲ ಬಿಟ್ಟು ಬಹು ದೂರ ಬಂದಾಗ ಹಳೆಯ ನೆನಪುಗಳು ಬಹಳ ಕಾಡುತ್ತದೆ. ಆ ಬಾಲ್ಯ , ಅಪ್ಪ ಅಮ್ಮನೊಂದಿಗೆ ಮಾಡಿದ ಹಠ, ಅವರ ಜೊತೆ ಕಳೆದ ನೆನಪುಗಳು , ಹಾಗೆ ನಮ್ಮ ಊರು , ಅಲ್ಲಿಯ ಬೋರ್ಗರೆಯುವ ಮಳೆ, ಮಳೆಯಲ್ಲಿ ಅಲೆದ ದಿನಗಳು , ಹೀಗೆ ಸಾಕಷ್ಟು . ಅದರಲ್ಲೂ ನಾನು ನನ್ನ ಪತಿ ಇಬ್ಬರೂ ಒಂದೆಕಡೆಯವರಾಗಿದ್ದರಿಂದ  (ಮಲೆನಾಡಿನವರಾಗಿದ್ದರಿಂದ) ನಮಗೆ ಆ ನೆನಪುಗಳು ಆ ಹಸಿರು , ಮಳೆ , ಅಲ್ಲಿ ಕಳೆದ ಬಾಲ್ಯದ ದಿನಗಳು ಬಹಳ ಕಾಡುತ್ತದೆ .  ಅದು ನಮಗೆ ಕಾಡುವುದು ಮತ್ತು ನಾವು ಅದನ್ನು ಕುಳಿತು ನೆನಪಿಸಿಕೊಂಡು ಒಬ್ಬರಿಗೊಬ್ಬರು ಹಂಚಿಕೊಳ್ಳುವುದು ಲಂಡನ್ ಬ್ರಿಡ್ಜ್ ನ ಪಕ್ಕದಲ್ಲಿ  ಇರುವ ಕಲ್ಲಿನ ಹಾಸಿನ ಮೇಲೆ ಕುಳಿತುಕೊಂಡಾಗ. ಹಾಗೆ ಮಾತನಾಡುತ್ತ ಕುಳಿತುಕೊಂಡರೆ ನಮಗೆ ಲಂಡನ್ ಬ್ರಿಡ್ಜ್ ನ ದೀಪಗಳು  ಜಗಮಗಿಸಹತ್ತಿದಾಗ ಎಚ್ಚರವಾಗುತ್ತದೆ ಒಹ್ ಎಷ್ಟು ಕತ್ತಲಾಗಿಬಿಟ್ಟಿತು ಮಾತನಾಡುತ್ತ ಸಮಯ ಕಳೆದದ್ದೇ ತಿಳಿಯಲಿಲ್ಲ ಎಂಬುದು.  

ಹಾಗೆ ನಾವಿಬ್ಬರೂ  ಒಟ್ಟು ಕುಳಿತು ಮಾತನಾಡಿ ಬಂದರೆ ನಮಗೆ ವೀಕೆಂಡ್ ಚನ್ನಾಗಿ ಕಳೆದೆವು ಸಾರ್ಥಕ ಎಂಬ ಭಾವ ಕೂಡ .  ಮಧುರ ನೆನಪುಗಳು ಬೇಕು ಸವಿಯಲು ಈ ಬದುಕು ಎಂದು ಹೀಗೆ ಜೊತೆ ಕುಳಿತು ಹರಟಿದಾಗೆಲ್ಲ  ಅನ್ನಿಸುತ್ತದೆ . ನಮ್ಮಲ್ಲಿ ನಾವು ಕಳೆದು ಹೋಗುವಂತೆ  ಮಾಡುವ ಆ ಬಾಲ್ಯ ಜೊತೆಗೆ ಈ ಲಂಡನ್ ನ ಟವರ್ ಬ್ರಿಡ್ಜ್  ನಮ್ಮಿಬ್ಬರಿಗೂ ಬಹಳ ಇಷ್ಟ .