ಇಂಗ್ಲೆಂಡ್ ನಲ್ಲೀಗ ಸ್ಪ್ರಿಂಗ್(ಹೂವುಗಳ ) ಕಾಲ

Published in Udayavani (AVALU suppliment ) 15/05/2013

ಹೇಳಿ ಕೇಳಿ ಇದು ಮೇ ತಿಂಗಳು . ಇಂಗ್ಲೆಂಡ್ ನಂತ ದೇಶಕ್ಕೆ ಲವಲವಿಕೆಯ ಕಾಲವಿದು . ಅಂತು ಎಲ್ಲರು ಕಾಯುತ್ತಿರುವ ಸ್ಪ್ರಿಂಗ್ ಕಾಲ ಬಂದುಬಿಟ್ಟಿತು ಎಂಬುದು ಸಂತಸದ ವಿಷಯ . ಇಷ್ಟು ಸಂತೋಷಕ್ಕೆ ಕಾರಣ ಏನೆಂದರೆ ಅಕ್ಟೋಬರ್ ತಿಂಗಳಿಗೆ ನಿಧಾನವಾಗಿ ಪ್ರಾರಂಭವಾದ ಚಳಿ, ದಿನಗಳು ಕಳೆದಂತೆ ಕೆಟ್ಟ ಚಳಿ ಯಾಗಿ ಪರಿಣಮಿಸಿ ಜನವರಿ ತಿಂಗಳು ಬರುವಷ್ಟರಲ್ಲಿ ಕೊರೆಯಲು ಪ್ರಾರಂಭಿಸಿ ಮಧ್ಯದಲ್ಲಿ ಹಿಮ ಕೂಡ ಬಿದ್ದು ಎಲ್ಲರನ್ನು ತಬ್ಬಿಬ್ಬು ಗೊಳಿಸಿಬಿದುತ್ತದೆ ಇಲ್ಲಿನ ಚಳಿ . 

ಸುಮಾರು -೮ ರವರೆಗೆ ಹೋಗುವ ಈ ಚಳಿಗೆ ಹೊರಗೆ ಕಾಲಿಡುವಾಗ ಫುಲ್ ಪ್ಯಾಕ್ ಆಗಿರಲೇಬೇಕು . ಇನ್ನು ಪ್ರತಿದಿನ ಆಫೀಸ್ ಗೆ ಹೋಗುವವರ ಗೋಳು ಕೇಳ ಕೂಡದು ಅಷ್ಟು ಭಯಾನಕವಾಗಿರುತ್ತದೆ. ಬೆಳಿಗ್ಗೆ ೬ ಗಂಟೆಗೆ ಎದ್ದು ತಿಂಡಿ ಮತ್ತು ಮಧ್ಯಾನ್ಹ ಬಾಕ್ಸ್ ಗೆ ಲಂಚ್ ತಯಾರು ಮಾಡುವಷ್ಟರಲ್ಲಿ ಸಾಕುಸಾಕು ಈ ದೇಶ ಹೊರಟುಬಿಡುವ ನಮ್ಮ ತಾಯ್ನಾಡಿಗೆ ಎನಿಸುವುದು ಖಂಡಿತ . ಇಷ್ಟೆಲ್ಲದರ ಜೊತೆಗೆ ಈ ವರ್ಷ ಏಪ್ರಿಲ್ ನಲ್ಲೂ ಕೂಡ ಸ್ನೋ ಫಾಲ್ ಆಗುವುದರ ಜೊತೆಗೆ ನಮ್ಮ ಆತಂಕವನ್ನು ಇನ್ನಷ್ಟು ಹೆಚ್ಚು ಮಾಡಿಬಿಟ್ಟಿತ್ತು . 

ಬಹುಷಃ ಈ ವರ್ಷ ಬಿಸಿಲೇ ಬರುವುದಿಲ್ಲ ಎಂಬ ಭಾವ ಮೂಡಿಬಿಟ್ಟಿತ್ತು . ಸುಮಾರು ೭ ತಿಂಗಳಿನಿಂದ ಕಾಯುತ್ತಿದ್ದ ಸೂರ್ಯನ ಕಿರಣಗಳು ಈಗ ನಿಧಾನವಾಗಿ ಬೀಳುತ್ತಿದೆ . ನಮ್ಮ ಭಾರತದ ಜನರು ೬ ತಿಂಗಳು ಒಳ ಕುಳಿತವರು ಈಗ ಮತ್ತೆ ಹೊರಸುತ್ತಲು ಪ್ರಾರಂಭಿಸಿಯಾಗಿದೆ . ಇನ್ನು ಇಂಗ್ಲೆಂಡ್ ನ ಜನರಿಗೆ ಇಲ್ಲಿನ ಚಳಿಗೆ ಹೊಂದಿಕೊಂಡು ಈಗ ತಾನೇ ಬೀಳುತ್ತಿರುವ ಸೂರ್ಯನ ಹೊOಗಿರನದಿಂದ ವಾತಾವರಣ ೧೫  ಡಿಗ್ರಿ ಗೆ ಬಂದಿರುವುದನ್ನು ಸಹಿಸಲಾಗದೆ ಬೀಚ್ ಗಳನ್ನು ಹುಡುಕಿ ಹೊರಟಿದ್ದಾರೆ . 

ಈ ಮೇ ತಿಂಗಳು ಇಷ್ಟವಾಗುವುದು ಇಲ್ಲಿನ ಗಿಡಮರಗಳ ಚಿಗುರುವಿಕೆಗೆ ಎಲ್ಲಿ ನೋಡಿದರೂ  ಹಚ್ಚ ಹಸಿರು . ಹೊರ ಹೊರಟರೆ ಮರದ ತುಂಬೆಲ್ಲ ತುಬಿರುವ ಹೂವುಗಳು , ಎಲ್ಲರ ಮನೆಯ ಮುಂಬಾಗದ ಗಾರ್ಡನ್ ಗಳಲ್ಲಿ ಕೆಂಪು ,ಹಳದಿ ,ನೇರಳೆ , ಬಿಳಿ ಹೀಗೆ ವಿವಿಧ ಬಣ್ಣದಿಂದ ಕಣ್ಸೆಳೆಯುವ ಹೂವುಗಳು . ಇಲ್ಲಿನ ಹೂವುಗಳು ವಿವಿದ ರೀತಿಯವು . ಇವುಗಳಲ್ಲಿ ಕೆಲವು ರಸ್ತೆಬದಿಗಳಲ್ಲಿ ತನ್ನಿಂದ ತಾನೇ ಹುಟ್ಟಿಕೊಳ್ಳುವುದು . ನೋಡಲು ಆಕರ್ಷಕವಾಗಿರುವ ಹೂವುಗಳು . ಇಲ್ಲಿ ಹೂವುಗಳನ್ನು ಮುಡಿಯಲು ಬಳಸುವುದಿಲ್ಲವಾದ್ದರಿಂದ ಕೇವಲ ಡೆಕೊರೆಶನ್ ಮತ್ತು ಬೊಕೆ ಗಳನ್ನೂ ತಯಾರಿಸಲು ಬಳಸಲಾಗುತ್ತದೆ. 

ಟುಲಿಪ್ : ವಿವಿಧ ಬಣ್ಣದ ಟುಲಿಪ್ ಹೂವುಗಳು ಇಂಗ್ಲೆಂಡ್ ಮತ್ತಿತರ ಪಾಶ್ಚಾತ್ಯ ದೇಶಗಳ ಆಕರ್ಷಣೆಗೆ ಪ್ರಮುಖವಾದ ಹೂವುಗಳು . ಇವುಗಳಲ್ಲಿ ಕೆಂಪು, ಬಿಳಿ , ಹಳದಿ ಇನ್ನಿತರ ಬಣ್ಣಗಳನ್ನು ಕಾಣಬಹುದು . 

ಬ್ಲೂ ಬೆಲ್ : ಇದು ನೇರಳೆ ಬಣ್ಣದ ಹೂವಾಗಿದೆ ಇದನ್ನು ಮುಗಿಯದ ಪ್ರೀತಿಯ ಸಂಕೇತವಾಗಿ ಬಳಸಲಾಗುತ್ತದೆ . ಇದು ಸಣ್ಣ ಗಂಟೆಯ (ಬೆಲ್) ರೂಪದಲ್ಲಿರುವುದರಿನ್ದ ಇದನ್ನು ಬ್ಲೂ ಬೆಲ್ ಎಂದು ಕರೆಯಲಾಗುತ್ತದೆ. ಇದು ಗೊಂಚಲುಗಳ ರೂಪದಲ್ಲಿ ಕಾಣಸಿಗುತ್ತವೆ. 

ಅಡೋನಿಸ್ : ಇದು ಹಳದಿ ಬಣ್ಣದ ಹೂವು ಗಳಾಗಿದ್ದು ಸಾಮಾನ್ಯವಾಗಿ ಏಪ್ರಿಲ್ ಮೇ ತಿಂಗಳಿನಲ್ಲಿ ರಸ್ತೆಯ ಬದಿಗಳಲ್ಲಿ ರಾಶಿ ಗಟ್ಟಲೆ ಹೂವು ಬಿಟ್ಟಿರುವುದನ್ನು ಕಾಣಬಹುದು . 

ಆಲ್ಮಂಡ್ ಬ್ಲಾಸಂಸ್ : ಈ ಹೂವು ಮರದಲ್ಲಿ ಬಿಡುವ ಹೂವಾಗಿದೆ ಇದು ಗುಲಾಬಿ ಮಿಶ್ರಿತ ಬಿಳಿ ಬಣ್ಣದಲ್ಲಿ ಇರುತ್ತದೆ . ಇದು ಕೂಡ ಮೇ ತಿಂಗಳಿನಲ್ಲಿ ಹೂವು ಬಿಟ್ಟು ಇಡೀ  ಮರವನ್ನೇ ಅಲಂಕರಿಸಿರುತ್ತದೆ.ಸಾಮಾನ್ಯವಾಗಿ ಇಲ್ಲಿನ ಎಲ್ಲ  ರಸ್ತೆ ಬದಿಗಳಲ್ಲಿ ಈ ಮರ ಇರುವುದರಿಂದ ಇದು ನೋಡುಗರನ್ನು ಆಕರ್ಷಿಸುವಲ್ಲಿ ಯಶಸ್ವಿಯಾಗಿದೆ . 

ಬ್ಯಾಚುಲರ್ ಬಟನ್ : ಇದನ್ನು ಕಾರ್ನ್ ಫ್ಲವರ್ ಎಂದು ಕೂಡ ಕರೆಯುತ್ತಾರೆ . ಇದು ನೋಡಲು ನಮ್ಮ ಭಾರತದಲ್ಲಿ ದೊರೆಯುವ ಸೇವಂತಿಗೆ ಹೂವಿನಂತೆ ಇರುತ್ತದೆ. ಇದನ್ನು  ನೀಲಿ , ನೇರಳೆ , ಬಿಳಿ , ಕೆಂಪು ಹೀಗೆ ಬೇರೆಬೇರೆ ಬಣ್ಣಗಳಲ್ಲಿ ಕಾಣಬಹುದು .  

ಧಾಲಿಯ : ನಮ್ಮ ಭಾರತದಲ್ಲಿ ಬೆಳೆಯುವ ಡೇರೆ ಹೂವುಗಳನ್ನು ಇಲ್ಲಿ ಧಾಲಿಯ ಎಂದು ಕರೆಯಲಾಗುತ್ತದೆ. ಇದು ಕೂಡ ಇಂಗ್ಲೆಂಡ್ ನ ಆಕರ್ಷಕ ಹೂವುಗಳಲ್ಲಿ ಒಂದಾಗಿದೆ . 

ಎವರ್ ಲಾಸ್ಟಿಂಗ್ ಫ್ಲವರ್ : ಇದು ಪುಟ್ಟ ಪುಟ್ಟ ಕೆಂಪು ಹೂವುಗಳಾಗಿದ್ದು ನೋಡಲು ಆಕರ್ಷಕವಾಗಿದೆ . ಸಣ್ಣ ಗಿಡದಲ್ಲಿ ಬೆಳೆಯುವ ಈ ಹೂವು ಏಪ್ರಿಲ್ ತಿಂಗಳಿನಲ್ಲಿ ಸರ್ವೇ ಸಾಮಾನ್ಯ . 

ಜೆರ್ಬೇರ : ಇದು ಬೊಕೆ ಗಳನ್ನೂ ಮಾಡಲು ಬಳಸುವ ಮುಖ್ಯ ಹುವುಗಳಲ್ಲಿ ಒಂದಾಗಿದ್ದು ನೋಡಲು ಬಹಳ ಆಕರ್ಶಕವಾಗಿರುತ್ತವೆ. ಸ್ವಲ್ಪ ಮಟ್ಟಿಗೆ ನಮ್ಮ ಸೂರ್ಯಕಾಂತಿ ಹೂವುಗಳನ್ನು ಹೊಲುತ್ತವೆ.  ಇದು ಕೂಡ ಬೇರೆಬೇರೆ ಬಣ್ಣಗಳಲ್ಲಿ ದೊರೆಯುವುದು ಆದರೂ ಕೇಸರಿ, ಹಳದಿ, ಬಿಳಿ, ಮತ್ತು ನೀಲಿ ಬಣ್ಣಗಳು ಹೆಚ್ಚು ಪ್ರಖ್ಯಾತಿ ಹೊಂದಿವೆ . 

ಇದಲ್ಲದೆ ಯಾಪಾಲ್ ಬ್ಲಾಸಂ , ಆಪ್ರಿಕಾಟ್  ಬ್ಲಾಸಂ , ಬಟರ್ ಕಪ್ ,  ಕ್ಯಾಕ್ಟಸ್ , ಕಾರ್ನೆಶನ್  ಹೀಗೆ ಪಟ್ಟಿ ಮಾಡುತ್ತಾ ಹೋದರೆ ಸಾಕಷ್ಟು ಹೊಸ ಹೂವುಗಳಿವೆ .  ಇವುಗಳೆಲ್ಲ ಇಂಗ್ಲೆಂಡ್ ನಲ್ಲಿ ಪ್ರಾರಂಭವಾದ ಈ ಸ್ಪ್ರಿಂಗ್ ನ ಆಕರ್ಷಕ ಅಥಿತಿ ಗಳು . ಇದು ನೋಡುಗರಿಗೆ ಲವಲವಿಕೆ ತರುವುದರಲ್ಲಿ ಯಾವುದೇ ಅನುಮಾನವಿಲ್ಲ . 

ಅರ್ಪಿತಾ ಹರ್ಷ 

ಲಂಡನ್

ಇದು ಇಂಗ್ಲೆಂಡ್ ನ ತಿರುಪತಿ

This article is published in vijayakarnataka on 4/05/13

ತಿರುಪತಿಯ ಬಾಲಾಜಿ ಎಂದರೆ ಎಲ್ಲರ ಮೆಚ್ಚಿನ ದೇವರು , ಸಂಕಟ ಬಂದಾಗ ವೆಂಕಟರಮಣ ಎಂಬ ಮಾತಿದೆ ಹಾಗೆ
ಕಷ್ಟ ಕಾಲದಲ್ಲೆಲ್ಲ್ಲ ನೆನಪಿಸಿಕೊಳ್ಳುವುದು ನಮ್ಮ ತಿರುಪತಿಯ ವೆಂಕಟರಮಣ ನನ್ನು . ತಿರುಪತಿ ಗೆ ಜೀವನದಲ್ಲಿ ಒಮ್ಮೆಯಾದರೂ  ಹೋಗಬೇಕು ಎಂಬ ಕನಸು ಬಹಳಷ್ಟು ಜನರದಾಗಿರುತ್ತದೆ ಹಾಗೆ ತಿರುಪತಿಗೆ ಹೋದರೆ ಅಂದುಕೊಂಡಿರುವುದೆಲ್ಲ ಆಗುತ್ತದೆ ಎಂಬುದು ಎಲ್ಲರ ಅನಿಸಿಕೆ ಕೂಡ .  ಇಂಗ್ಲೆಂಡಿನಲ್ಲಿ ಸಾಕಷ್ಟು ಭಾರತೀಯರಿದ್ದಾರೆ ಅವರೆಲ್ಲರ ತಿರುಪತಿ ಗೆ ಹೋಗುವ ಕನಸು ಈಡೇರಿಸಲು ಇಂಗ್ಲೆಂಡ್ ನಲ್ಲು ಕೂಡ ಒಂದು ಬಾಲಾಜಿ ದೇವಸ್ಥಾನವಿದೆ . ಇಂಗ್ಲೆಂಡ್ ನಲ್ಲಿ ನೆಲಸಿರುವ ಜನರಿಗೆ ಇದೇ ತಿರುಪತಿ . 

ಇಂಗ್ಲೆಂಡ್ ನ ಬರ್ಮಿಂಗ್ ಹ್ಯಾಮ್ ಎಂಬಲ್ಲಿ ವೆಂಕಟರಮಣನ ದೇವಸ್ಥಾನವಿದೆ . ಇದು ಇಂಗ್ಲೆಂಡ್ ನ ಮಧ್ಯಭಾಗದಲ್ಲಿ ಬರುತ್ತದೆ. ಲಂಡನ್ ನಿಂದ ಟ್ರೈನ್ ನಲ್ಲಿ ಸುಮಾರು ೨ ತಾಸಿನ ಪ್ರಯಾಣ . ಇದು ಇಂಗ್ಲೆಂಡ್ ನ ಅತಿ ದೊಡ್ಡ ದೇವಸ್ಥನವಾಗಿದ್ದು ನೋಡಲು  ಸಹ ತಿರುಪತಿ ದೇವಸ್ಥಾನ ದ ರೀತಿಯೇ ಇದೆ. ಬರ್ಮಿಂಗ್ ಹ್ಯಾಮ್ ನಿಂದ ೧ ಗಂಟೆಗಳ ಕಾಲ ಬಸ್ ನಲ್ಲಿ ಹೋಗಬೇಕು . ಇದು ಸ್ವಲ್ಪ ಹಳ್ಳಿಯನ್ತಿರುವ  ಪ್ರದೇಶದಲ್ಲಿ ನಿರ್ಮಿಸಲಾಗಿದೆ . ಗುಡ್ಡದ ಮೇಲೆ ದೇವಸ್ಥಾನವನ್ನು ನಿರ್ಮಿಸಲಾಗಿದೆ . ವಿಶಾಲವಾದ ಜಾಗವನ್ನು ಹೊಂದಿದ ಈ ದೇವಸ್ಥಾನದಲ್ಲಿ ವೆಂಕಟರಮಣ ಮುಖ್ಯ ದೇವರು ಜೊತೆಗೆ ಹನುವಂತ,ಗಣಪತಿ, ನವಗ್ರಹ , ಲಕ್ಷ್ಮಿ ದೇವಿ ಗಳ ಮೂರ್ತಿ ಗಳನ್ನೂ ಕಾಣಬಹುದು . ಆದರೆ ಎಲ್ಲ ದೇವಸ್ಥಾನಗಳಂತೆ ಇಲ್ಲೂ ಕೂಡ ಛಾಯಾಚಿತ್ರ ತೆಗೆಯುವುದನ್ನು ನಿಷೇದಿಸಲಾಗಿದೆ . 

ಇಲ್ಲಿ ಹೋಗಲು ಎಲ್ಲ ದಿನಗಳು ಕೂಡ ಪಸಕ್ತ ದಿನಗಳೇ ವರ್ಷದ ೩೬ ೫  ದಿನಗಳು ಕೂಡ ಇದು ತೆರೆದಿರುತ್ತದೆ. ಮತ್ತು ಸದಾ ಬಕ್ತಾದಿಗಳಿಂದ ತುಮ್ಬಿರುತ್ತದೆ. ಉತ್ತರ ಭಾರತ ದಕ್ಷಿಣ ಭಾರತದ ಸಾಕಷ್ಟು ಭಕ್ತಾದಿಗಳನ್ನು ಪ್ರತಿದಿನ ಕಾಣಬಹುದು . ಜೊತೆಗೆ ಪ್ರತಿ ದಿನ ಅನ್ನಸಂತರ್ಪಣೆ ವ್ಯವಸ್ಥೆ ಕೂಡ ಮಾದಲಾಗಿದೆ. ವಿಶೇಷ ಹಬ್ಬದ ದಿನಗಳಲ್ಲಿ ಸಾವಿರಾರು ಜನರಿಗೆ ಊಟದ ವ್ಯವಸ್ಥೆಯನ್ನು ಅಚ್ಚುಕಟ್ಟಾಗಿ ಆಂದ್ರ ಸ್ಟೈಲ್ ಅಡುಗೆ ಮಾಡ ಲಾಗುತ್ತದೆ. 

ತಿರುಪತಿ ಯಲ್ಲಿ ದೊರೆಯುವಂತೆ ಇಲ್ಲೂ ಕೂಡ ಲಾಡು ದೊರೆಯುತ್ತದೆ. ವಿವಿಧ ರೀತಿಯ ಪೂಜೆ ಮಾದುವ ಅವಕಾಶವಿದೆ ಅದರೊಂದಿಗೆ ತಿರುಪತಿಯ ಲಾಡನ್ನು ಕೂಡ ನೀಡಲಾಗುತ್ತದೆ .ಹೆಚ್ಚು ಬೇಕಾದಲ್ಲಿ ಕೊಂಡುಕೊಳ್ಳಬಹುದು .  ಪ್ರತಿ ದಿನ ಸಾವಿರಾರು ಲಾಡುಗಳು ಸೇಲ್ ಆಗುತ್ತದೆ . ವಿವಿದ ರೀತಿಯ ಪೂಜೆಗಳನ್ನು ಕೂಡ ಮಾಡಲಾಗುತ್ತದೆ. ಮದ್ಯಾನ್ಹ 1 2 ಗಂಟೆಗೆ ಮಹಾಮಂಗಳಾರತಿ ಮಾಡಲಾಗುತ್ತದೆ . ಅದಲ್ಲದೆ ಸಂಜೆ ೪ ಗಂಟೆಗೆ ಪುನಃ ಅರ್ಚನೆ ಮಾಡಲಾಗುತ್ತದೆ. ಮದ್ಯಾನ್ಹ 1 ರಿಂದ ಊಟದ ವ್ಯವಸ್ಥೆ ಪ್ರತ್ಯೇಕ ಕೊನೆಯಲ್ಲಿ ಮಾಡಲಾಗಿದ್ದು ೩ ಗಂಟೆಯವರೆಗೂ ಉದ್ದವಾದ ಕ್ಯು ಇರುತ್ತದೆ. 

 ತಿರುಪತಿಯಲ್ಲಿ ೨ ನಿಮಿಷದಲ್ಲಿ ವೆಂಕಟರಮಣನ ದರ್ಶನ ಮಾಡಿಕೊಂಡು ಮುಂದೆ ಹೋಗಬೇಕಾಗಬಹುದು ಆದರೆ ಇಲ್ಲಿ ೨ ಗಂಟೆ ಬೇಕಾದರೂ ಅಲ್ಲೇ ಕುಳಿತುಕೊಳ್ಳುವ ಅವಕಾಶವಿರುತ್ತದೆ. ಜೊತೆಗೆ ಸತ್ಯನಾರಾಯಣ ಪೂಜೆ ಇನ್ನಿತರ ಪೂಜೆಗಳನ್ನು ಕೂಡ ಅಲ್ಲೇ ಮಾಡಿಸ ಲಾಗುತ್ತದೆ . ಲಂಡನ್ ನಿಂದ ಮಿಡ್ ಲ್ಯಾಂಡ್ ಮತ್ತು ವರ್ಜೀನಿಯಾ ಟ್ರೈನ್ ಗಳು ಬಿರ್ಮಿಂಗ್ ಹ್ಯಾಮ್ ಗೆ ಹೊಗುತ್ತದೆ.

ಅರ್ಪಿತಾ ಹರ್ಷ 

ಲಂಡನ್

ಆರತಿ ತಟ್ಟೆ

ಮನೆಯಲ್ಲಿ ಏನಾದರೂ ಪೂಜೆಗಳು ನಡೆಯುತ್ತಿರುತ್ತವೆ. ಆಗೆಲ್ಲ ಹೊಸ ರೀತಿಯ ಆರತಿ ತಟ್ಟೆ ತಯಾರಿಸಿ ಅದನ್ನು ದೇವರ ಆರತಿಗೆ ಬಳಸಲಾಗುತ್ತದೆ . ಇದು ನೋಡಲು ಕೂಡ ಆಕರ್ಷಕವಾಗಿರುತ್ತದೆ ಎಂದು ಮಲೆನಾಡು ಪ್ರದೇಶಗಳಲ್ಲಿ ಹಿಂದಿನಿಂದಲೂ ನಡೆಸಿಕೊಂಡು ಬರುತ್ತಿರುವ ಪದ್ಧತಿಗಳಲ್ಲಿ ಆರತಿ ತಟ್ಟೆ ಸಿಂಗರಿಸುವುದು ಕೂಡ ಒಂದು ಪದ್ಧತಿ ಎಂಬಂತೆಯೇ ನಡೆದುಕೊಂಡು ಬರುತ್ತಿದೆ . ಆರತಿ ತಟ್ಟೆಯನ್ನು ವಿವಿಧ ರೀತಿಯಲ್ಲಿ ತಯಾರಿಸಬಹುದು . ಆರತಿ ತಟ್ಟೆಗೆ ದೀಪದ ಎಣ್ಣೆ ಸವರಿ ಅದರ ಮೇಲೆ ಕುಂಕುಮವನ್ನು ಅಥವಾ ಅರಿಸಿನವನ್ನು ಉದುರಿಸಿ ನನತರ ಬೆಂಕಿ ಕಡ್ಡಿಯ ತುದಿಯಿಂದ ಬೇಕಾದ ರೀತಿಯ ದೇವರ  ಚಿತ್ರವನ್ನು ಅಥವ ರಂಗೋಲಿಯನ್ನು ಬರೆದರೆ ಆಕರ್ಷನೀಯವಾಗಿರುತ್ತದೆ .  ಆದರೆ ನವರಾತ್ರಿಗಳಲ್ಲಿ ೯ ದಿನಗಳೂ  ಕೂಡ ಆರತಿ ಮಾಡಬೇಕಾದಾಗ ಪ್ರತಿ ದಿನ ತಯಾರು ಮಾಡುವುದು ಸ್ವಲ್ಪ ಕಷ್ಟವೇ . ಅಂತಹ ಸಂಧರ್ಭ ಗಳಲ್ಲಿ ಉಪಯೋಗಕ್ಕೆ ಬರುವಂತೆ ಹೀಗೆ ಮಾಡಿ ನೋಡಿ . ಎಲ್ಲರ ಮನ ಗೆಲ್ಲಿ . 

ಬೇಕಾಗುವ ಸಾಮಗ್ರಿಗಳು :

೧ ಸ್ಟೀಲ್ ತಟ್ಟೆ ( ಬೇಕಾದ ಸೈಜ್ ದು .. )

ಕೆಂಪು ಮತ್ತು ಹಳದಿ ಬಣ್ಣ (ಪೈಂಟ್ ಮಾಡಲು ಬಳಸುವ ಬಣ್ಣದ ಡಬ್ಬಿ)

ಪೈಂಟ್ ಬ್ರಷ್ (ಸಣ್ಣ ಎಳೆ ಬರುವನ್ತದ್ದು ) 

೧. ಮೊದಲು ಸ್ಟೀಲ್ ತಟ್ಟೆಯನ್ನು ಚೆನ್ನಾಗಿ ತೊಳೆದು ಒಣಗಿಸಿ ಒರೆಸಿ ಇಟ್ಟುಕೊಳ್ಳಿ . 

೨. ನಂತರ ಹಳದಿ ಬಣ್ಣವನ್ನು ಪ್ಲೇಟ್ ನ ಪೂರ್ಣ ಭಾಗಕ್ಕೆ ಒಂದು ಕೋಟ್ ಹಚ್ಚಿ ಬಿಸಿಲಿನಲ್ಲಿ ಇಡಿ . 

೩. ಸಂಪೂರ್ಣವಾಗಿ ಒಣಗಿದ ನಂತರ ಬೇಕಾದಲ್ಲಿ ಇನ್ನೊಂದು ಕೊಟ್ ಹಚ್ಚಿ ಒಣಗಿಸಿ  . 

೪. ನಂತರ ಕೆಂಪು ಬಣ್ಣದಿಂದ ಬೇಕಾದ ರೀತಿಯ ಚಿತ್ರ ಅಥವಾ ರಂಗೋಲಿಯನ್ನು ಹೊಸ ರೀತಿಯ ಡಿಸೈನ್ ಅನ್ನು ಪೇಂಟಿಂಗ್ ಬ್ರಷ್ ನಿಂದ  ಬಿಡಿಸಿ ಪುನಃ ಬಿಸಿಲಲ್ಲಿ ಇಟ್ಟು  ಒಣಗಿಸಿ . 

ನೋಡಲು ಕೂಡ ಸುಂದರವಾಗಿ ಕಾಣುವ ಇದು ವರ್ಷಗಳ ವರೆಗೆ ಬಣ್ಣ ಮಾಸುವುದಿಲ್ಲ ಮನೆಯಲ್ಲಿ ಏನಾದರೂ  ಪುಜೆಗಳಿರುವ ದಿನಗಳಲ್ಲಿ ಬಳಸಬಹುದು . ಜೊತೆಗೆ ಸುಲಭವೂ ಹೌದು . 

ಅರ್ಪಿತಾ ಹರ್ಷ 

ಲಂಡನ್

ಆ ಬಾಲ್ಯ

ಈ ನನ್ನ ಲೇಖನವು ಉದಯವಾಣಿಯಲ್ಲಿ ಪ್ರಕಟವಾಗಿದೆ 24/04/13

ಮನಸ್ಸಿಗೆ ಬೇಸರವಾದರೆ ಕೆಲವೊಮ್ಮೆ ಹಾಡು ಕೇಳಿದರೆ ಏನೋ ಒಂದು ರೀತಿಯ ನೆಮ್ಮದಿ ದೊರಕುವುದುಂಟು . ಅಂತಹ ಹಾಡುಗಳಲ್ಲಿ ನನಗೆ ಬಹಳ ಹತ್ತಿರವೆನಿಸುವ  ಹಾಡೆಂದರೆ ಜಗಜಿತ್ ಸಿಂಗ್ ರ 

ಏ ದೌಲತ್ ಬಿ ಲೇಲೋ ಶರಾರಥ್ ಬಿ ಲೇಲೋ

 ಭಲೇ ಛೀನ್  ಲೇ ಮುಜ್ ಸೆ ಮೇರಿ ಜವಾನಿ 

ಮಗರ್ ಲೌಟ್  ದೋ ಮುಜ್ಕೋ ಬಚ್ಪನ್ ಕಾ  ಸಾವನ್ 

ವೋ ಕಾಗಜ್ ಕಿ ಕಷ್ತಿ ವೋ ಭಾರೀಶ್ ಕಾ ಪಾನಿ .

ಈ ಸಂಪತ್ತು ಈ ಯೌವನ ಏನನ್ನು ಬೇಕಾದರೂ ನನ್ನಿಂದ ಕಿತ್ತುಕೊ ಆದರೆ ನನಗೆ ನನ್ನ ಬಾಲ್ಯವನ್ನು ಮತ್ತು ಬಾಲ್ಯದಲ್ಲಿ ಆ ಮಳೆಯ ನೀರಿನಲ್ಲಿ  ಕಾಗದದ ದೋಣಿಯಲ್ಲಿ ಆಡುತ್ತಿದ್ದ ಆ ದಿನಗಳನ್ನು ಪುನಃ ಹಿಂತಿರುಗಿಸು ಎಂಬ ಸಾಲುಗಳು ಬಾಲ್ಯದ ನೂರಾರು ನೆನಪುಗಳನ್ನು ಕಣ್ಣೆದುರು ತಂದು ನಿಲ್ಲಿಸುತ್ತದೆ .

 ಈ ಹಾಡು ನನ್ನನ್ನು ಬಹಳ ಹಳೆಯ ಕಾಲಕ್ಕೆ ಕರೆದೊಯ್ಯುತ್ತದೆ . ಆ ಕಾರಣಕ್ಕಾಗಿ ನನಗೆ ಈ ಹಾಡು ಬಹಳ ಇಷ್ಟ ಕೂಡ . ಈ ಹಾಡಿನ ಪ್ರತಿ ಪದಗಳು ಬಹಳ ಸೊಗಸಾಗಿದೆ . ಮತ್ತು ಅರ್ಥವತ್ತಾಗಿದೆ .  ಎಲ್ಲರೂ  ತಮ್ಮ ಬಾಲ್ಯವನ್ನು ಇಷ್ಟಪಡುತ್ತಾರೆ ಆದರೆ ಅದು ಮರಳಿ ಬಾರದ ದಿನಗಳು.  ಆದರೂ ಕಳೆದುಹೋದ ಆ ಬಾಲ್ಯದ ನೆನಪು ಯಾವಾಗಲೂ ಬಹಳ ಸೊಗಸು . ಆದ ಕಾರಣಕ್ಕೆ ನನಗೆ ಈ ಹಾಡು ಏನೋ ಒಂದು ರೀತಿ ಮನಸ್ಸಿಗೆ ತಟ್ಟುತ್ತದೆ . 

ಮಗುವಿನಲ್ಲಿರುವ ಆ ಮುಗ್ದತೆ , ಸ್ವಚ್ಚಂದ ಮನಸ್ಸು, ಎಲ್ಲರೊಡನೆ ಬೆರೆಯುವ ಪರಿ , ಕ್ಷಣ ಕ್ಷಣದಲ್ಲೂ ಕಾಣುವ ಆ ಕುಶಿ , ಬೇರೆಯವರ ಏಳಿಗೆಯನ್ನು ಕರುಬದೆ ಬೆಳೆಯುವ ಆ ದಿನಗಳು  ಇವುಗಳೆಲ್ಲ ಬೆಳೆದು ದೊಡ್ಡವರಾದಂತೆ ನಾವೆಲ್ಲೋ ಕಳೆದುಕೊಳ್ಳುತ್ತಿದ್ದೇವೆ ಎಂದೆನಿಸುತ್ತದೆ .  

 ಇದು ಕೇಳಿದಷ್ಟು ಮತ್ತೆ ಮತ್ತೆ ಕೇಳಬೇಕೆನಿಸುವ ಹಾಡು . ಬಾಲ್ಯದ ದಿನಗಳನ್ನು ಮತ್ತಷ್ಟು ಕೆದಕುತ್ತದೆ. ಕೆಲವೊಮ್ಮೆ ನೋವಿನಲ್ಲೂ ಸುಖವಿರುತ್ತದೆ ಹಾಗೆಯೇ ಕಳೆದು ಹೋದ ಬಾಲ್ಯ ಹಿಂತಿರುಗಿ ಬರಲಾದಕ್ಕೆ ಬೇಸರವಿದ್ದರೂ ಅದನ್ನು ನೆನಪಿಸುವ ಈ ಹಾಡಿನಲ್ಲಿ ಸಂತೋಷವಿದೆ . ಜೊತೆಗೆ ಕೇಳಿದಷ್ಟು ಬೇಸರ ಬರದ ಮನಸ್ಸಿಗೆ ನಾಟುವ ಪದ ವರ್ಣನೆ .  ಬೇಸರವಾದ ಕ್ಷಣಗಳಲ್ಲಿ ಈ ಹಾಡುಗಳನ್ನು ಕೇಳಿ ನನ್ನ ಮನಸ್ಸನ್ನು ಸಹಜ ಸ್ಥಿತಿ ಗೆ ತರಿಸುವ ಈ ಹಾಡು ನನಗೆ ಒಂದು ರೀತಿಯ ಸ್ಪೂರ್ತಿ . 

ಅರ್ಪಿತಾ ಹರ್ಷ 

ಲಂಡನ್ 

ಬಸ್ ಪ್ರಯಾಣದ ಮೋಜು

Pulished in Sakhi agust 1st Sakhi magazine 

ಮೊದಲೆಲ್ಲ ನನಗೆ ದೂರದ ಪ್ರಯಾಣ ಎಂದರೆ ಇಷ್ಟ,  ಒಬ್ಬಳೇ ಹೋಗಬೇಕು ಎಂದರೆ ಸ್ವಲ್ಪ ಹೆಚ್ಚೇ ಇಷ್ಟ . ಕಿಟಕಿಯ ಪಕ್ಕದಲ್ಲಿ ಕುಳಿತು ಇಷ್ಟವಾದ ಹಾಡುಗಳನ್ನು ಒಂದಾದ ಮೇಲೊಂದರಂತೆ ಗುನುಗಿಕೊಳ್ಳುತ್ತಾ ಹೋಗುವುದೆಂದರೆ ಬಹಳ ಕುಶಿ.  ಹಾಗೆ ಹೋಗುವಾಗಲೆಲ್ಲ ನನ್ನ ಕನಸಿಗೆ ಯೋಚನಾ ಲಹರಿಗೆ ಯಾರೂ  ಅಡ್ಡಿ ಬರುವುದಿಲ್ಲವಾದ್ದರಿಂದ (ಬಂದರೂ ನನಗೆ ಅದರ ಬಗ್ಗೆ ಗಮನವಿಲ್ಲದಿರುವುದರಿಂದ) ನನಗೆ ಒಬ್ಬಳೇ ಕುಳಿತು ದೂರ ಹೋಗುವುದೆಂದರೆ ಇಷ್ಟವಾಗುತ್ತಿತ್ತು ಜೊತೆಗೆ ಕಾಲೇಜು ದಿನಗಳಲ್ಲಿ ಒಬ್ಬಳೇ ಹೋಗುವ ಅನಿವಾರ್ಯತೆ ಕೂಡ ಬರುತ್ತಿತ್ತು .  ಈಗ ಹೋಗಬೇಕೆಂದರು ಅವಕಾಶ ಸಿಗದಿದುದಕ್ಕೆ ಸ್ವಲ್ಪ ಬೇಸರವೂ  ಇದೆ .  ಹಾಗೆ ಹೋಗುವಾಗಲೆಲ್ಲ ಏನಾದರೊಂದು ನೆನಪಿನಲ್ಲಿ ಉಳಿಯುವಂತಹದ್ದು ಆಗುತ್ತಿತ್ತು . ಇಲ್ಲದಿದ್ದರೆ ಹೊಸ ಫ್ರೆಂಡ್ಸ್ ಸಿಗುತ್ತಿದ್ದರು . 

ಈಗ ನಾಲ್ಕು ವರ್ಷದ ಹಿಂದೆ ನಡೆದ ಘಟನೆ . ಹಾಗೆ ಒಮ್ಮೆ ಬೇಸಿಗೆ ರಜೆ ಬಂದಾಗ ಮನೆಗೆ ಹೋಗಲು ಉಜಿರೆಯಿಂದ ಸಾಗರದ ಬಸ್ ಹತ್ತ ಬೇಕಾಗಿತ್ತು . ಶಾಂತಿಸಾಗರ ಎಂಬ ಒಂದೇ ಬಸ್ ಬೆಳ್ತಂಗಡಿ ಇಂದ ಡೈರೆಕ್ಟ್ ಸಾಗರಕ್ಕೆ ಹೋಗುತ್ತಿತ್ತು . ಹಾಗಾಗಿ ಬೆಳಗ್ಗೆ ಮುಂಜಾನೆ ಉಜಿರೆಯಿಂದ ಬೆಳತಂಗಡಿಗೆ ಒಂದು ಬಸ್ ಹಿಡಿದು ಹೊರಟೆ . ರಜೆಗೆಂದು ಹೊರಟಿದ್ದರಿಂದ ಕೈಯಲ್ಲಿ ಎರಡು ಬ್ಯಾಗ್ ನಷ್ಟು ಲಗೇಜ್ ಇತ್ತು . ಬಸ್ ಹತ್ತಿದ್ದೆ ಪಕ್ಕದಲ್ಲಿ ಒಬ್ಬರು ಬಂದು ಕುಳಿತರು . ಜೊತೆಗೆ ಆ ಗಂಡಸು ನನ್ನೇ ನೋಡುತ್ತಿದ್ದ ನನಗೆ ಕೆಟ್ಟ ಕೋಪ ಬಂದಿತ್ತು . ಆತ ನನ್ನನ್ನು ನೋಡುತ್ತಿದ್ದನೋ ಅಥವಾ ಅದು ನನ್ನ ಭ್ರಮೆಯೋ ಎಂಬುದು ಬಗೆಹರಿಯದ ವಿಷಯ .      ಹದಿನೈದು ನಿಮಿಷದಲ್ಲಿ ನನ್ನ ಸ್ಟಾಪ್ ಬಂದಿದ್ದು ನನಗೆ ಬಹಳ ಸಂತೋಷವಾಯಿತು . ಅವನನ್ನು ಕೆಕ್ಕರಿಸಿ ನೋಡಿ ಇಳಿದುಬಂದೆ . 

ಇಳಿಯುವಷ್ಟರಲ್ಲಿ ಶಾಂತಿಸಾಗರ ಹೊರಡುತ್ತಿತ್ತು ಓಡಿ  ಹೋಗಿ ಹತ್ತಿಕೊಂಡೆ . ಆತನೂ ಬಸ್ ಹತ್ತಿದ ಮತ್ತೆ ನನ್ನ ನೋಡಿದ ನನಗೆ ಇನ್ನೂ ಕೋಪ ಬಂತು ಸ್ವಲ್ಪ ಹೊತ್ತಿನಲ್ಲಿ  ಟಿಕೆಟ್ ಕೇಳಲು ಕಂಡಕ್ಟರ್ ಬಂದು ಕೇಳಿದ್ದಕ್ಕೆ ಇಲ್ಲ ನಾ ಈ ಬ್ಯಾಗ್ ಅನ್ನು ತಲುಪಿಸಲು ಬಂದೆ ಎಂದರು ... 

ನೋಡುತ್ತೇನೆ ನನ್ನದೇ ಬ್ಯಾಗ್ ಇಳಿಯುವ ಭರದಲ್ಲಿ ಒಂದು ಬ್ಯಾಗ್ ಬಿಟ್ಟು ಬಂದುಬಿಟ್ಟಿದ್ದೆ ಪಾಪ ಆತ  ಅದನ್ನು ಗಮನಿಸಿ ನನಗೆ ಹಿಂತಿರುಗಿಸಲು ಬಂದರೆ ನಾನು ಕೆಕ್ಕರಿಸಿ ನೋಡಿಬಿಟ್ಟಿದ್ದೆ .  ಅವರು ನನಗೆ ಬ್ಯಾಗ್ ಹಿಂತಿರುಗಿಸಿದರು ನಾನು ಥ್ಯಾಂಕ್ಸ್ ಹೇಳಿದೆ ಆತ ಏನೂ  ಹೇಳದೆ ಹಿಂತಿರುಗಿ ಹೋದ  ಬಸ್ ಜೋರಾಗಿ ಹೊರಟಿತು . 

ಒಮ್ಮೊಮ್ಮೆ ಅಪಾರ್ಥ ದಿಂದಾಗಿ ಒಳ್ಳೆಯವರನ್ನು ಕೆಟ್ಟವರು ಎಂದುಕೊಳ್ಳುವ ಪರಿಸ್ಥಿತಿ ಬಂದುಬಿಡುತ್ತದೆ . ಅವರು ಸಹಾಯಕ್ಕೆ ಬಂದರೆ ನಾನು ತಪ್ಪು ತಿಳಿದುಕೊಂಡು ಬಿಟ್ಟಿದ್ದೆ . ಮನೆಗೆ ಬಂದು ಹೀಗಾಯಿತು ಎಂದು ಕತೆ ಹೇಳಿದರೆ ಎಲ್ಲರೂ  ಗೊಳ್ ಎಂದು ನಕ್ಕು ಆ ನಂತರ ಆತನನ್ನು ಹೊಗಳಿದರು ನನ್ನನ್ನು ತೆಗಳಿದರು . 

ಅರ್ಪಿತಾ ಹರ್ಷ 

ಲಂಡನ್ .

ಬರ್ಮಿಂಗ್ ಹ್ಯಾಮ್ ಬಾಲಾಜಿ ಟೆಂಪಲ್

ಭಾರತದಲ್ಲಿ ತಿರುಪತಿ ಎಂದರೆ ಎಲ್ಲರೂ  ಒಮ್ಮೆ ಹೆಮ್ಮೆ ಪಡುತ್ತಾರೆ. ಒಮ್ಮೆಯಾದರೂ  ವೆಂಕಟರಮಣನ ಸನ್ನಿಧಿಗೆ ಹೋಗಿ ದರ್ಶನ ಪಡೆದು ಪುನೀತರಾಗಬೇಕು ಎಂದು ಬಯಸುತ್ತಾರೆ. ಹಾಗೆಯೇ ಈ ಇಂಗ್ಲೆಂಡ್ ಗೆ ಬರ್ಮಿಂಗ್ ಹ್ಯಾಮ್ ಎಂಬಲ್ಲಿರುವ

ಬಾಲಾಜಿ ಟೆಂಪಲ್ ಪ್ರಸಿದ್ದಿ ಪಡೆದಿದೆ. ಇಂಗ್ಲೆಂಡ್ ನಲ್ಲಿರುವ ಭಾರತೀಯರಿಗೆ ಬರ್ಮಿಂಗ್ ಹ್ಯಾಮ್  ನ ವೆಂಕಟರಮಣ ದೇವಸ್ಥಾನವೇ  ತಿರುಪತಿ ಟೆಂಪಲ್ ಎಂದರೆ ತಪ್ಪಲ್ಲ. ಹಾಗೆ ನಮಗೂ ಲಂಡನ್ ನಿಂದ ಬರ್ಮಿಂಗ್ ಹ್ಯಾಮ್  ಗೆ ಹೋಗಬೇಕೆನ್ನುವುದು ಬಹಳ ದಿನಗಳ ಆಸೆಯಾಗಿತ್ತು . ಹಾಗೆ ಫ್ರೆಂಡ್ಸ್ ಎಲ್ಲ ಸೇರಿ ಕಳೆದ ಈಸ್ಟರ್ ನಲ್ಲಿ ೪ ದಿನಗಳ ರಜೆ ಇರುವುದರಿಂದ ಇದೇ  ಸೂಕ್ತ ಸಮಯ ಎಂದು ಹೊರಟುಬಿಟ್ಟೆವು . 

ಲಂಡನ್ ನಿಂದ ಸುಮಾರು ೩ ತಾಸುಗಳ ಪ್ರಯಾಣ . ಲಂಡನ್ ನಿಂದ ಟ್ರೈನ್ ನಲ್ಲಿ ಹೊರತು ಬಿರ್ಮಿಂಗ್ ಹ್ಯಾಮ್  ನಲ್ಲಿ ಇಳಿದು ನಂತರ ಅಲ್ಲಿಂದ ಬಸ್ ನಲ್ಲಿ ಹೋಗಬೇಕು .ಟೆಂಪಲ್ ಪ್ರತಿ ದಿನ ಬೆಳಿಗ್ಗೆ ೭ ಗಂಟೆ ಇಂದ ಮದ್ಯಾನ್ಹ ೨ ಗಂಟೆಯವರೆಗೆ ಮತ್ತು ಮದ್ಯಾನ್ಹ ೪ ಗಂಟೆಯಿಂದ ಸಂಜೆ ೮ ಗಂಟೆಯವರೆಗೆ ತೆರೆದಿರುತ್ತದೆ. ಸರಿಯಾಗಿ ೧೨ ಗಂಟೆಗೆ ಮಹಾ ಮಂಗಳಾರತಿ , ಪೂಜೆಗಳು ನೆರವೇರುತ್ತದೆ. ನಂತರ ಸಂಜೆ ೪ ಗಂಟೆಯಿಂದ ಅರ್ಚನೆ ಆರಂಭವಾಗುತ್ತದೆ.  

ನಾವು ಬೆಳಗ್ಗೆ ಸರಿಯಾಗಿ ೭.೩೦ ಕ್ಕೆ ಮನೆಯಿಂದ ಹೊರಟೆವು ನಾವಿರುವ ಸ್ಥಳದಿಂದ ಲಂಡನ್ ಯುಸ್ಟನ್  ಎಂಬಲ್ಲಿಗೆ ಹೋಗಿ ಅಲ್ಲಿಂದ ಡೈರೆಕ್ಟ್ ಟ್ರೈನ್ ಹೋಗುವುದಾಗಿ ಮೊದಲೇ ನಿರ್ಧರಿಸಿಕೊಂಡಿದ್ದೆವು. ಬಿರ್ಮಿಂಗ್ ಹ್ಯಾಮ್  ರೈಲು ನಿಲ್ಧಾಣಕ್ಕೆ  ಹೋಗಿ ತಲುಪುವಾಗ ೧೨.೩೦ ಆಗಿತ್ತು . ನಮಗೆ ಇರುವುದು ಒಂದೇ ದಾರಿ ೨ ಗಂಟೆಯೊಳಗೆ ಬಿರ್ಮಿಂಗ್ ಹ್ಯಾಮ್ ಟೆಂಪಲ್ ತಲುಪಬೇಕು ಇಲ್ಲದಿದ್ದರೆ ಸಂಜೆ ೪ ಗಂಟೆಯವರೆಗೆ ಬೇರೆಡೆ ಹೋಗಿ ನಂತರ ಟೆಂಪಲ್ ಗೆ ಹೋಗಬೇಕು . ಬರ್ಮಿಂಗ್ ಹ್ಯಾಮ್  ಸ್ಟೇಷನ್ ನಿಂದ ಟೆಂಪಲ್ ಗೆ ೪೫ ನಿಮಿಷದ ಪ್ರಯಾಣವಾಗಿತ್ತು ಅಂತು ಎಲ್ಲರ ಒಪ್ಪಿಗೆ ಮೇರೆಗೆ ಟೆಂಪಲ್ ಗೆ ಮೊದಲು ಹೋದೆವು . ಅಷ್ಟರಲ್ಲಾಗಲೇ ನಮ್ಮ ಹೊಟ್ಟೆ ತಾಳ ಹಾಕುತ್ತಿತ್ತು . ಅಲ್ಲಿ ಊಟದ ವ್ಯವಸ್ಥೆ ಇರುವುದರಿಂದ ಪ್ರಸಾದ ಊಟ ಸೇವಿಸಿ ನಂತರ ಹೊರಗೆ ಹೋಳಿಯ ಓಕುಳಿ ಆಟ ಆಡುವ ವ್ಯವಸ್ಥೆ ಕಲ್ಪಿಸಲಾಗಿತ್ತು ನಾವು ಆಟವಾಡಿ ಒಳ ಹೋಗುವಷ್ಟರಲ್ಲಿ ಸರಿಯಾಗಿ ೩.೩೦ ಆದದ್ದರಿಂದ ಒಂದರ್ದ ಗಂಟೆ ದೇವಸ್ಥಾನದಲ್ಲಿ ಕುಳಿತು ನಂತರ ಅರ್ಚನೆ ಮಾಡಿಸಿಕೊಂಡು ಲಡ್ಡು ತೆಗೆದುಕೊಂಡು ಮನೆಕಡೆ ಹೊರಟೆವು .

ಹುಚ್ಚಿ ! (ಕಥೆ)

ಮನೆ ಕ್ಲೀನ್ ಮಾಡುತ್ತಾ ಸುಸ್ತಾದ ಅಂಬಿಕ ಗಂಡನೊಡನೆ ಕೂಗುತ್ತಿದ್ದಳು 'ಇಷ್ಟೆಲ್ಲಾ ಮಾಡೋದು ಎಷ್ಟು ಕಷ್ಟ ಗೊತ್ತ ಒಬ್ಬಳೇ ಮಾಡ್ಬೇಕು ಯಾರು ಹೆಲ್ಪ್ ಗೆ ಬರಲ್ಲ ಹೋಗಿ ಹೋಗಿ ಈ ದೊಡ್ಡ ಮನೆಗೆ ಬಂದು ಕುಳಿತಿದ್ದೀರ ಆ ಮನೆಯಿಂದ ಈ ಮನೆಗೆ ಸೇರಿಸೋ ಅಷ್ಟರಲ್ಲಿ ನಾ ಹಾಸ್ಪಿಟಲ್ ಸೇರೋದು ಖಂಡಿತ ' .  ಅದಕ್ಕೆ ಗಣಪತಿ 'ಅಯ್ಯೋ ನೀ ಮೊದಲೇ ಹೇಳಿದ್ರೆ ಬರ್ತಾ ಆ ಪುಷ್ಪ ಳನ್ನಾದ್ರು ಕರ್ಕೊಂಡು ಬರ್ತಿದ್ದೆ'  . ಅಂಬಿಕ ಳ  ಸುಸ್ತೆಲ್ಲ ಒಮ್ಮೆಲೇ ಮಾಯಾವಾಗಿ ಮುಖದಲ್ಲಿ ಚಿಲ್ಲನೆ ಒಂದು ನಗು ಬಂತು . ಅಲ್ಲೇ ಕುಳಿತಿದ್ದ ಸರಳಳಿಗೆ   ಇವರ ಸರಳ ಭಾಷೆ ಒಗಟಂತೆ  ಕಾಣುತ್ತಿತ್ತು . 'ಅತ್ತೆ ಅದು ಯಾರು ಪುಷ್ಪ ಎಂದರೆ?' ಕೇಳಿಯೇ ಬಿಟ್ಟಳು  .' ಅಯ್ಯೋ ಸರಳಾ ನೀ ನೋಡ್ಲಿಲ್ವಾ ಅದೇ ಆ ಹುಚ್ಚಿ ,ಇರು ತೋರಿಸ್ತೀನಿ ಇವತ್ತು ಸಂಜೆ ಪೇಟೆ ಕಡೆ ಹೋದಾಗ' ಎಂದರು ಅತ್ತೆ  . ಸರಳ ಈಗ ಸಂಜೆ ಆಗುವುದನ್ನೇ ಕಾಯುತ್ತಿದ್ದಳು .

ಸಂಜೆ ಎಂದಿನಂತೆ ಪೇಟೆಯ ಕಡೆಗೆ ಹೊರಟಾಗ ಅದೇ ನೋಡು ಅಲ್ಲಿ ಮಾರಮ್ಮನ ಗುಡಿ ಮುಂದೆ ಕುಂತವಳೇ ಆ ಹುಚ್ಚಿ ಪುಷ್ಪ ಎಂದು ಬೇಗ ಬೇಗ ಮುಂದೆ ಹೋಗುತ್ತಿದ್ದರೆ ಸರಳ ಳ   ಕಣ್ಣು ಆ ಪುಷ್ಪಳನ್ನೇ ನೋಡುತ್ತಿತ್ತು . ಹಿಂದೆ ತಿರುಗಿ ತಿರುಗಿ ನೋಡುತ್ತಾ ಹೋದವಳಿಗೆ ಆ ದಿನವೆಲ್ಲ ಅವಳೇ ಕಣ್ಣೆದುರು.  

ಪುಷ್ಪ ಹೆಸರೆಷ್ಟು ಚಂದವಿದೆ .ಹೆತ್ತವರು ಮಗಳ ಬಗ್ಗೆ ಎಷ್ಟು ಕನಸು ಕಂಡಿರಬಹುದು ಆ ಹೆಸರಿಡುವಾಗ ! ಆಕೆ ನೋಡಲೇನು ಹುಚ್ಚಿ ಎನಿಸುವುದಿಲ್ಲ . ಬಣ್ಣ ಸ್ವಲ್ಪ ಕಂದು , ಒಂದು ಪ್ಯಾಂಟ್ ಮತ್ತು ಶರ್ಟ್ ಹಾಕಿಕೊಂಡಿರುತ್ತಾಳೆ ಜೊತೆಗೆ ಬಾಯ್ ಕಟ್ ಬಹುಷಃ ಯಾರೋ ಕನಿಕರದಿಂದ ಅವಳ ಕೂದಲನ್ನು ಕಟ್ ಮಾಡಿ ಸ್ವಲ್ಪ ಸ್ವಚ್ಚವಾಗಿರುವಂತೆ ನೋಡಿಕೊಂಡಿರಬೇಕು . ಆಕೆಯದು ಕರ್ಲಿ ಹೇರ್ ಅಂತಾರಲ್ಲ ಹಾಗೆ . 

ದೇವಸ್ಥಾನದ ಮುಂದೆ ಅವಳ ವಾಸ . ಹಾಗಂತ ರಾತ್ರಿ ೭ ಗಂಟೆಯ ಮೇಲೆ ಆಕೆ ಅಲ್ಲಿ ಕಾಣುವುದೇ ಇಲ್ಲ ಎಲ್ಲಿ ಹೋಗುತ್ತಾಳೆ ಎಂಬುದು ಯಾರಿಗೂ ತಿಳಿಯದ ವಿಷಯ . ಬೆಳಿಗ್ಗೆ ೯ ಗಂಟೆಗೆ ಸರಿಯಾಗಿ ಮಾರಮ್ಮನ ದೇವಸ್ಥಾನದ ಬಾಗಿಲು ತೆಗೆದ ತಕ್ಷಣ ಆಕೆ ಅಲ್ಲಿ ಹಾಜರ್ ಮತ್ತೆ ಸಂಜೆ ೭ ಗಂಟೆಗೆ ಗುಡಿ ಮುಚ್ಚಿದ ಮೇಲೆ ಅಲ್ಲಿಂದ ಆಕೆ ಕದಲುವುದು . ಬಿರುಬಿಸಿಲಿಗೂ ಅಂಜದೆ ಕುಳಿತ ಆಕೆಯನ್ನು ಆ ಮಾರಮ್ಮ ಒಂದು ದಾರಿ ತೋರಿಸಬಾರದೆ?ಎಂದೆನಿಸದೆ ಇರಲಿಲ್ಲ ಸರಳಳಿಗೆ .

ಮೂರು ನಾಲ್ಕು ದಿನಗಳು ಹೀಗೆ ಪೇಟೆ ಗೆ ಹೋಗುವಾಗಲೆಲ್ಲ ಆಕೆಯನ್ನು ನೋಡಿ ಬಂದಾದ ಮೇಲೆ ಮತ್ತೆ ಕೇಳಿದಳು ಅಂಬಿಕಳನ್ನು 'ಅತ್ತೆ  ಆ ಪುಷ್ಪ ಯಾಕೆ ಹಾಗಾಗಿದ್ದು? ಪಾಪ ಅಲ್ವಾ?'

ಹ್ಮ ನನಗೂ  ಸರಿಯಾಗಿ ಗೊತ್ತಿಲ್ಲ ಯಾಕೆ ಎಂದು ಅವರಿವರು ಹೇಳಿದ್ದು ಹೇಳಬಹುದು ಅವಳದೊಂದು ಪ್ರೀತಿಯಲ್ಲಿ ಬಿದ್ದ ಕಥೆ ಒಂದು ಹುಡುಗನನ್ನು ಬಹಳ ಇಷ್ಟ ಪಡುತ್ತಿದ್ದಳಂತೆ ಅವನೂ  ಹಾಗೂ  ಹೀಗೂ ಇವಳನ್ನು ಅವನಿಷ್ಟದಂತೆ ಕುಣಿಸಿ ಕೊನೆಗೆ ಅದ್ಯಾವುದೋ ಒಂದು ಪ್ಯಾಂಟು ಶರ್ಟು ಹಾಕಿರೋ ಹುಡುಗಿ ನಿನಗಿಂತ ಚನ್ನಾಗಿದ್ದಾಳೆ  ಅಂತ ಇವಳನ್ನು ಬಿಟ್ಟು ಅವಳೊಡನೆ ಓಡಿ ಹೋಗಿ ಬಿಟ್ಟನಂತೆ.

 ಅಂದಿನಿಂದ ಈಕೆ  ಮಾರಮ್ಮನ ಗುಡಿಯಲ್ಲಿ ಕೈಮುಗಿದು ಕುಳಿತುಕೊಂಡು ಆತನ ಬರುವಿಕೆ ಗೆ ಕಾಯುತ್ತಿದ್ದಳಂತೆ ದಿನ ಕಳೆದಂತೆ ಅನ್ನ  ನೀರು ಬಿಟ್ಟು ಕುಳಿತ  ಈಕೆಯನ್ನು ಜನ ಹುಚ್ಚಿ ಎನ್ನಲು  ಪ್ರಾರಂಭಿಸಿದರು . ಕೊನೆಗೆ ಅದ್ಯಾರೋ ಅವಳ ಹರಿದ ಬಟ್ಟೆ ನೋಡಲಾಗದೆ ಅವಳಿಗೆ ಹಳೆಯದೊಂದು ಪ್ಯಾಂಟು ಶರ್ಟು ಕೊಟ್ಟರು ಕಾಣುತ್ತೆ ಅವಳು ಅದನ್ನು ಹಾಕಿ ಮಾರಮ್ಮ ಕೊನೆಗೂ ದಯೆ ತೋರಿದಳು ಪ್ಯಾಂಟು ಶರ್ಟು ಹಾಕಿಕೊಂಡೆ ಇನ್ನು ಆ ಹುಡುಗ ಬಂದರೆ ತನ್ನ ಇಷ್ಟಪಡುತ್ತಾನೆ ಎಂದು ಅಲ್ಲೇ ಕಾಯುತ್ತಾ ಕುಳಿತು ಕೊಂಡಿರುತ್ತಾಳೆ  .ಪಾಪ ಆ ಹುಡುಗ ತಿರುಗಿ ಬಂದಿಲ್ಲ ಬಂದರೂ  ಈಕೆಯನ್ನ ಗುರುತಿಸಲಾರ. ಗುರುತಿಸಿದರೂ  ಹುಚ್ಚಿ ಯನ್ನು ಯಾರಾದರೂ  ಕಟ್ಟಿಕೊಳ್ಳಲು ಸಾಧ್ಯವೇ? 

ಸರಳ ಮನಸ್ಸಲ್ಲೇ ಅಂದುಕೊಂಡಳು ಆಕೆ ನೋಡಲು ಹುಚ್ಚಿಯಂತೆ ಕಾಣುವುದಿಲ್ಲ ,ಅವಳಿಗೆ ಹುಚ್ಚು ಹಿಡಿದಿರುವುದು ಪ್ಯಾಂಟು ಶರ್ಟಿ ನದು. ಜನ ಆಕೆಯನ್ನೇ ಹುಚ್ಚಿ ಮಾಡಿಬಿಟ್ಟಿದ್ದಾರೆ!!. ಪ್ರೀತಿ ಏನೆಲ್ಲಾ ಮಾಡಿಬಿಡುತ್ತದೆ. ಕಣ್ಣಲ್ಲಿ ನೀರು ತುಂಬಿಕೊಂಡ ಸರಳ ಯೋಚಿಸುತ್ತಿದ್ದಳು .

ಅರ್ಪಿತಾ ಹರ್ಷ 

ಲಂಡನ್